4 Patshalar 5 bob
1 Aram patshasının' sa'rka'rdası Naaman o'z mırzası ushın ullı ha'm hu'rmetli adam edi. Sebebi Jaratqan İye aramlılarg'a ol arqalı jen'is sıylag'an edi. Naaman ma'rt jawınger edi, biraq ol jaman teri keselligine jolıqqan edi.
2 Burın aramlılar bir shabıwıl jasag'anında, İzraildan bir kishkene qızdı tutqın etip alıp kelgen edi. Bul qız Naamannın' hayalına xızmet etetug'ın edi.
3 Bir ku'ni ol o'z biykesine: «Qa'nekey, mırzam Samariyadag'ı payg'ambarg'a barg'anda ma edi, ol onı teri keselliginen azat etken bolar edi», – dedi.
4 Bunı esitkende, Naaman barıp, izraillı qızdın' aytqanların o'z mırzasına, patshag'a aytıp berdi.
5 Aram patshası Naamang'a: «Jolg'a atlan, men İzrail patshasına xat jazıp beremen», – dedi. Ol on talant gu'mis, altı mın' shekel altın ha'm on qatar kiyim alıp, jolg'a shıqtı.
6 Ol xattı İzrail patshasına a'kelip berdi. Xatta bılay dep jazılg'an edi: «Bul xat penen birge qulım Naamandı sizge jiberip atırman. Onı teri keselliginen azat etiwin'izdi qa'leymen».
7 İzrail patshası xattı oqıp ko'rdi de, kiyimlerin jırtıp: «Adamnın' teri keselligin jazıw ushın mag'an adam jiberetug'ınday, men ne jan alıp jan beretug'ın Quday ma edim? Mine, ko'rin'ler ha'm bilip qoyın'lar, ol menin' menen urısıw ushın sebep izlep atır», – dep baqırdı.
8 İzrail patshasının' kiyimlerin jırtqanın esitken Qudaydın' adamı Elisha patshag'a: «Nege kiyimlerin'izdi jırttın'ız? Ol adamdı mag'an jiberin', İzrailda bir payg'ambar bar ekenin bilip qoysın», – degen xabar jiberdi.
9 Solay etip, Naaman atları ha'm arbaları menen Elishanın' u'yinin' esiginin' aldına kelip turdı.
10 Sonda Elisha xabarshısın jiberip, ol arqalı Naamang'a bılay dedi: «Barıp, İordan da'ryasına jeti ret juwın, sonda terin' jan'arıp, pa'k bolasan'».
11 Naaman bug'an qattı ashıwlanıp: «Men, ol aldımnan shıg'ıp, o'z Qudayı Jaratqan İyenin' atın aytıp shaqıradı ha'm kesellengen jerime qolın qoyıp, onı jazadı dep oylag'an edim.
12 Damasktegi Abana ha'm Parpar da'ryaları İzraildag'ı barlıq da'ryalardın' suwlarınan artıq emes pe? Men olarda-aq juwınıp, pa'klenip almas pa edim?» – dedi de, ashıwg'a buwlıg'ıwı menen burılıp ketti.
13 Biraq Naamannın' xızmetshileri janına kelip: «Mırzam, eger payg'ambar sizge qıyınıraq bir isti isle degende, islemes pe edin'iz? Ol sizge tek: „Barıp juwın, tazalanasan'“, – dedi-g'o», – dedi.
14 Bunnan son', Naaman Qudaydın' adamının' so'zi boyınsha İordan da'ryasına barıp, jeti ret su'n'gidi. Sonda onın' denesi na'restenin' denesindey tap-taza boldı ha'm ol pa'klendi.
15 Naaman barlıq adamları menen birge Qudaydın' adamına qaytıp keldi ha'm onın' aldında turıp bılay dedi: – Mine, endi pu'tkil jer betinde İzraildın' Qudayınan basqa qudaydın' joq ekenin bildim. O'tinemen, qulın'ızdın' mına sawg'asın qabıl etin', – dedi.
16 Biraq Elisha og'an: – O'zim xızmetinde bolg'an tiri Jaratqan İye haqı ant ishemen: hesh na'rse almayman, – dedi. Naaman Elishanı alıwg'a ko'ndirmekshi boldı, biraq ol almadı.
17 Sonda Naaman bılay dedi: – Onda mag'an usı jerdin' topırag'ınan eki g'ashırım ko'tere alg'anday topıraq alıwg'a ruxsat berin'. O'ytkeni qulın'ız bolg'an men endigiden bılay Jaratqan İyeden basqa hesh bir qudayg'a jandırılatug'ın qurbanlıqlar ha'm basqa qurbanlıqlar bermeymen.
18 Biraq mına jag'dayda Jaratqan İye qulın keshiriwin o'tinemen: mırzam Rimmonnın' butxanasına tabınıw ushın barg'anda, ol menin' qolıma su'yenedi. Sol waqıtta, Rimmonnın' butxanasında men de onın' menen birge ta'jim qılaman. Sonda Jaratqan İye meni keshirsin.
19 Elisha og'an: – Aman-esen kete ber, – dedi. Naaman sol jerden shıg'ıp, biraz uzaqlasqanda,
20 Qudaydın' adamı bolg'an Elishanın' xızmetshisi Gexaziy ishinen bılay dedi: «Mırzam bul aramlı Naamannın' a'kelgen sawg'aların alıwdan bas tarttı. Tiri Jaratqan İye haqı ant ishemen: men onın' izinen quwıp jetip, onnan bir na'rseler alaman».
21 Solay etip, Gexaziy Naamandı quwıp ketti. Naaman izinen birewdin' quwıp kiyatırg'anın ko'rgende, arbadan tu'sti de, onı qarsı alıp: – Amanlıq pa? – dep soradı.
22 Gexaziy og'an: – Amanlıq, – dep juwap berdi. – Mırzam meni: «Jan'a g'ana Efrayımnın' tawlı u'lkesindegi payg'ambarlar toparınan eki jigit kelip qaldı. Olarg'a bir talant gu'mis ha'm eki qatar kiyim bersin», – degen xabar menen jiberdi.
23 Naaman: – O'tinemen, eki talant gu'mis al, – dedi. Onı ko'ndirip, eki talant gu'misti eki dorbag'a salıp bayladı ha'm eki qatar kiyim qosıp berip, olardı o'zinin' eki xızmetshisine ko'tertti. Olar Gexaziydin' aldında ju'rdi.
24 To'beshikke jetkende, Gexaziy zatlardı olardın' qolınan alıp, u'yge jasırdı ha'm adamlardı izine qaytarıp jiberdi.
25 Keyin o'zi Elishanın' aldına keldi. Elisha onnan: – Gexaziy qay jaqtan kiyatırsan'? – dep soradı. Gexaziy: – Qulın'ız hesh jaqqa barmadı, – dep juwap berdi.
26 Sonda Elisha og'an: – Sol adam arbasınan tu'sip, seni qarsı alg'anda ruwxım senin' menen birge emes pe edi? Ha'zir gu'mis, kiyim, za'ytu'n ha'm ju'zim bag'ların, mayda ha'm iri mallar, qul ha'm shorılar alatug'ın waqıt pa?
27 Usı isin' ushın Naamannın' jaman teri keselligi ma'n'gige sag'an ha'm senin' urpag'ın'a jabıssın, – dedi. Gexaziy Elishanın' aldınan shıqqanda, onın' jaman teri keselligine shalıng'an denesi tu'lep ketken edi.
