4 Patshalar 25 bob
1 Sedekiyanın' patshalıg'ının' tog'ızınshı jılının' onınshı ayının' onınshı ku'ni Babilon patshası Nabuxodonosor pu'tkil a'skerleri menen Erusalimnin' a'tirapına kelip, orda qurdı ha'm qalanın' do'geregine topıraq u'ydi.
2 Qala Sedekiyanın' patshalıg'ının' on birinshi jılına deyin qamalda boldı.
3 Sol jılg'ı to'rtinshi aydın' tog'ızınshı ku'ni qalada ashlıqtın' ha'wij alg'anı sonshelli, xalıqta bir tislem nan da qalmadı.
4 Sol waqıtta qala diywalının' bir jeri buzıldı. Babiloniya a'skerlerinin' qalanı qamal qılıp turg'anına qaramastan, barlıq a'skerler tu'nde patshanın' bag'ının' janındag'ı eki diywal arasındag'ı da'rwaza arqalı shıg'ıp, İordan tegisligine qaray qashıp ketti.
5 Biraq Babiloniya a'skerleri patshanı quwıp ketip, Erixo tegisliginde og'an jetip aldı. Ha'mme a'skerler patsha Sedekiyanı taslap, qashıp ketti.
6 Patshanı tutqıng'a alıp, onı Riblag'a, Babilon patshasına apardı ha'm sol jerde og'an hu'kim shıg'arıldı.
7 Babilonlılar Sedekiyanın' ko'z aldında ulların bawızladı, al o'zinin' ko'zlerin oyıp aldı. Son'ınan kisenlep, Babilong'a alıp ketti.
8 Babilon patshası Nabuxodonosordın' patshalıg'ının' on tog'ızınshı jılının' besinshi ayının' jetinshi ku'ni Babilon patshasının' xızmetshisi, saqshılar baslıg'ı Nabuzaradan Erusalimge keldi.
9 Ol Jaratqan İyenin' İbadatxanasına, patsha sarayına ha'm Erusalimdegi ha'mme u'ylerge ot berip, barlıq a'hmiyetli imaratlardı jag'ıp jiberdi.
10 Saqshılar basshısı menen birge kelgen Babiloniya a'skerleri Erusalim do'geregindegi diywallardı qulatıp tasladı.
11 Saqshılardın' basshısı Nabuzaradan qalada qalg'anlardı, Babilon patshası ta'repine o'tken qashqınlardı ha'm basqa a'piwayı xalıqtı su'rgin etti.
12 Nabuzaradan ju'zimgershilik ha'm diyxanshılıq penen shug'ıllanıwı ushın u'lkedegi jarlı xalıqtın' bir qanshasın taslap ketti.
13 Babilonlılar Jaratqan İyenin' İbadatxanasındag'ı qola o'relerdi, tu'beldiriklerdi, qola hawızdı bo'leklep, qolanı Babiloniyag'a alıp ketti.
14 Sonın' menen birge, olar xızmet etiw waqtında qollanılatug'ın ku'l salınatug'ın ıdıslar, ku'l alatug'ın belsheler, pilik keskishlerdi, tu'tetki salatug'ın tostag'anlardı ha'm qoladan islengen ha'mme na'rselerdi alıp ketti.
15 Saqshılar basshısı altın ha'm gu'misten islengen buyımlardın' ha'mmesin, shoq salınatug'ın ıdıslardı ha'm qan sebetug'ın tabaqlardı alıp ketti.
16 Jaratqan İyenin' İbadatxanası ushın Sulayman isletken eki o're, hawız ha'm tu'beldirikler ushın ketken qolanın' esabı joq edi.
17 Ha'r bir o'renin' biyikligi on segiz shıg'anaq bolıp, u'stinde qoladan islengen to'belik bar edi. Ha'r bir to'beliktin' biyikligi u'sh shıg'anaq bolıp, olar aylandırıp qoladan islengen shınjırlı torlar ha'm quyma anarlar menen bezelgen edi.
18 Saqshılar basshısı Nabuzaradan bas ruwxaniy Serayanı, ekinshi da'rejeli ruwxaniy Sefaniyanı ha'm İbadatxana bosag'asındag'ı u'sh qadag'alawshı ruwxaniydi tutqıng'a aldı.
19 Ja'ne de, ol Erusalimde qalg'an a'skerlerdin' a'skerbasısın, patshanın' bes wa'zirin, u'lke xalqın a'skerlikke shaqırıw isi menen shug'ıllanatug'ın a'skerbasının' xatkerin ha'm u'lke xalqının' alpısın tutqıng'a aldı.
20 Saqshılar baslıg'ı Nabuzaradan olardı Riblag'a, Babilon patshasına alıp bardı.
21 Babilon patshası Xamat jerinde, Riblada olardı o'ltirtti. Solay etip, Yahuda xalqı o'z u'lkesinen su'rgin etildi.
22 Babilon patshası Nabuxodonosor Shafannın' aqlıg'ı Axiqamnın' ulı Gedaliyanı Yahudada qalg'an xalıq u'stinen ha'kim etip tayınladı.
23 Ha'mme a'skerbasılar ha'm olardın' adamları Babilon patshasının' Gedaliyanı ha'kim etip qoyg'anın esitkende, Mispa qalasına, Gedaliyanın' janına keldi. Kelgenler Netaniya ulı İsmayıl, Qareax ulı Yuxanan, netofalı Tanxumet ulı Seraya, maaxalının' ulı Yazaniya ha'm olardın' adamları edi.
24 Gedaliya olarg'a ha'm olardın' adamlarına ant iship: «Babilonlı xızmetkerlerdin' qol astında bolıwdan qorqpan'lar. U'lkege ornalasıp, Babilon patshasına xızmet etin'ler. Sonda sizler ushın jaqsı boladı», – dedi.
25 Biraq usı jıldın' jetinshi ayında patsha na'silinen bolg'an Elishamanın' aqlıg'ı Netaniyanın' ulı İsmayıl on adamı menen Mispag'a barıp, Gedaliyanı o'ltirdi. Olar Mispada Gedaliyanın' janında bolg'an Yahuda xalqın da kaldeyliler menen birge qılıshtan o'tkerdi.
26 Sonda u'lkeninen kishkenesine deyin pu'tkil xalıq kaldeylilerden qorqqanınan a'skerbasılar menen birge Mısırg'a qashtı.
27 Yahuda patshası Ehoyakinnin' su'rgin etilgenine otız jeti jıl bolg'anda, Ewil-Merodax Babilong'a patsha boldı. Ol sol jıldın' on ekinshi ayının' jigirma jetinshi ku'ni Yahuda patshası Ehoyakindi zindannan shıg'ardı.
28 Patsha og'an jaqsı qatnasta boldı ha'm og'an Babilong'a su'rgin etilgen basqa patshalardan joqarıraq bolg'an ma'rtebe berdi.
29 Solay etip, Ehoyakin zindandag'ı kiyimlerin sheship, taza kiyimler kiydi ha'm o'mirinin' aqırına shekem patsha dasturxanınan awqat jedi.
30 Ja'ne de, o'mirinin' aqırına shekem og'an ku'ndelikli kerek-jarag'ı patsha ta'repinen berildi.
