4 Patshalar 23 bob
1 Patsha İoshiya adam jiberip, Yahuda ha'm Erusalimnin' barlıq aqsaqalların o'z janına topladı.
2 Son'ınan ol pu'tkil Yahuda menen pu'tkil Erusalim turg'ınların, ruwxaniylerdi, payg'ambarlardı, u'lkeninen kishkenesine deyingi pu'tkil xalıqtı ertip, Jaratqan İyenin' İbadatxanasına bardı. Patsha Jaratqan İyenin' İbadatxanasınan tabılg'an Kelisim kitabın basınan ayag'ına deyin olarg'a dawıslap oqıp berdi.
3 Keyin patsha su'tinnin' janındag'ı arnawlı ornında turıp, Jaratqan İyenin' aldında kelisim du'zdi. Ol Jaratqan İyenin' jolı menen ju'rip, Onın' buyrıqların, qararların, qag'ıydaların shın ju'rekten, janta'ni menen orınlawg'a, bul kitapta jazılg'an kelisim so'zlerine a'mel qılıwg'a ant ishti. Pu'tkil xalıq ta kelisimge qosıldı.
4 Sonnan son', patsha bas ruwxaniy Xilkiyag'a, ekinshi da'rejeli ruwxaniylerge ha'm bosag'adag'ı qadag'alawshı ruwxaniylerge Baalg'a, Asherag'a ha'm pu'tkil aspan denelerine arnap islengen ha'mme na'rselerdi Jaratqan İyenin' İbadatxanasınan alıp shıg'ıwdı buyırdı. Olardı Erusalimnin' sırtındag'ı Kidron oypatlıg'ında o'rtetip, ku'lin Beyt-Elge aparg'ızdı.
5 Patsha Yahuda qalalarında ha'm Erusalim a'tirapındag'ı sıyınıw orınlarında tu'tetki tu'tetiw ushın Yahuda patshaları ta'repinen tayınlang'an butqa xızmet etiwshi ruwxaniylerdi, Baalg'a, quyashqa, ayg'a, juldızlarg'a ha'm pu'tkil aspan denelerine arnap tu'tetki tu'tetkenlerdi joq qıldı.
6 Kiyeli ag'ashın Jaratqan İyenin' İbadatxanasınan Erusalimnin' sırtına, Kidron sayına shıg'ardı. Onı sol jerde jag'ıp, ku'l-talqan etti ha'm ku'lin ulıwma xalıqlıq qa'birlerdin' u'stine shashtı.
7 Buzıqshılıq islewshi erkeklerdin' Jaratqan İyenin' İbadatxanasındag'ı u'ylerin buzıp tasladı. Ol jerde hayallar Ashera butına arnap, kiyimler toqıytug'ın edi.
8 İoshiya Yahuda qalalarındag'ı Jaratqan İyenin' ha'mme ruwxaniylerin jıynap, Erusalimge alıp keldi. Keyin Gebadan Beer-Shebag'a shekemgi ruwxaniyler tu'tetki tu'tetip, sıyınatug'ın orınlardı haramladı. Qala ha'kimi bolg'an Eshuanın' da'rwazasına kirer awızdag'ı sıyınıw orınların da joq qıldı. Bul da'rwaza qala da'rwazasının' shep ta'repinde edi.
9 Sıyınıw orınlarının' ruwxaniyleri Erusalimdegi Jaratqan İyenin' qurbanlıq ornında qurbanlıq bere almasa da, olar o'z ka'siplesleri bolg'an ruwxaniyler menen ashıtqısız nan jeytug'ın edi.
10 İoshiya hesh kimnin' quday Moloxqa arnap o'z ulın yaki qızın otta jandırmawı ushın, Ben-Hinnom oypatlıg'ındag'ı Tofetti de haramlap, jaramsız awhalg'a keltirdi.
11 Ol Jaratqan İyenin' İbadatxanasının' kirer aldına, saray xızmetshisi Natan-Melextin' bo'lmesinin' qasına Yahudanın' burıng'ı patshalarının' quyashqa arnap qoydırg'an atlarının' mu'sinlerin alıp taslap, olardın' arbaların otta jandırdı.
12 İoshiya Axazdın' joqarıdag'ı bo'lmesinin' tambasındag'ı Yahudanın' burıng'ı patshaları qurdırg'an qurbanlıq orınların da, Jaratqan İyenin' İbadatxanasının' eki ha'wlisindegi Menashshenin' qurdırg'an qurbanlıq orınların da buzdırdı. Olardı maydalap ezip, Kidron sayına shashıp jiberdi.
13 Ja'ne ol Erusalimnin' shıg'ısına, Za'ytu'n tawının' qublasına İzrail patshası Sulaymannın' sidonlılardın' jerkenishli butı Ashtarta, moablılardın' jerkenishli butı Kemosh ha'm ammonlardın' jerkenishli butı Milkomg'a arnap qurdırg'an sıyınıw orınların haramladı.
14 İoshiya kiyeli taslardı ku'l-talqan etip, kiyeli ag'ashların kesip tasladı ha'm olardın' orınların adam su'yegine toltırdı.
15 Bunnan tısqarı, İzraildı gu'nag'a baslag'an Nabat ulı Yarobam qurdırg'an Beyt-Eldegi sıyınıw ornın ha'm qurbanlıq ornın joq qıldı. Ol sıyınıw ornın jag'ıp jiberip, ku'lin ko'kke suwırdı, kiyeli ag'ashın da jag'ıp jiberdi.
16 İoshiya aynalasına qarap, taw u'stindegi qa'birlerdi ko'rdi. Ol adamların jiberip, qa'birdegi su'yeklerdi aldırttı ha'm olardı qurbanlıq orınnın' u'stinde jag'ıp jiberip, qurbanlıq orındı haramladı. Bul Jaratqan İyenin' Qudaydın' adamı arqalı aldın ala aytqan so'zleri boyınsha boldı.
17 İoshiya: – Ana jerdegi qulpı tas kimdiki? – dep soradı. Qala turg'ınları og'an: – Yahudadan kelgen Qudaydın' adamının' qa'biri. Ol Beyt-Eldegi qurbanlıq orında ha'zir siz islegen isler tuwralı aldın ala ja'riyalag'an edi, – dep juwap berdi.
18 Sonda patsha: – Og'an tiymen'ler, hesh kim onın' su'yeklerinin' tınıshın almasın, – dedi. Solay etip, onın' su'yeklerine de, Samariyadan kelgen payg'ambardın' su'yeklerine de hesh kim tiymedi.
19 İzrail patshaları Jaratqan İyenin' g'a'zebin keltirip, Samariya qalalarındag'ı sıyınıw orınlarına butxanalar qurdırg'an edi. İoshiya Beyt-Elde islegenlerin bul jerde de islep, bul butxanalardı da qıyratıp tasladı.
20 Ol sol jerdegi sıyınıw orınlarının' ruwxaniylerin qurbanlıq orın u'stinde bawızlap, sol jerde adam su'yeklerin jandırdı ha'm son'ınan Erusalimge qaytıp keldi.
21 Patsha İoshiya pu'tkil xalıqqa: «Qudayın'ız Jaratqan İyege arnap Qutqarılıw bayramın mına Kelisim kitabında jazılg'anı boyınsha bayramlan'lar», – dep buyrıq berdi.
22 Sebebi İzrailda biyler basqarg'an da'wirden baslap, İzrail ha'm Yahuda patshaları basqarg'an da'wir boyı Qutqarılıw bayramı usılay bayramlanbag'an edi.
23 Jaratqan İyege arnalg'an bul Qutqarılıw bayramı İoshiyanın' patshalıg'ının' on segizinshi jılında, Erusalimde bolıp o'tti.
24 Bunnan basqa, İoshiya ruwxaniy Xilkiyanın' Jaratqan İyenin' İbadatxanasınan tapqan kitabında jazılg'an nızam so'zlerin orınlaw ushın, Erusalimde ha'm Yahuda jerinde payda bolg'an barlıq jerkenishli islerdi: a'rwaqlardı ha'm ruwxlardı shaqırıwshılardı, u'y qudaylarının' mu'sinlerin ha'm butlardı joq qıldı.
25 İoshiyadan aldın da, onnan keyin de og'an uqsap Muwsanın' ha'mme Nızamlarına boysınıp, pu'tkil jan-ta'ni ha'm bar ku'shi menen Jaratqan İyege ju'z burg'an patsha bolmadı.
26 Biraq Menashshe o'z isleri arqalı Jaratqan İyenin' g'a'zebin keltirgeni ushın, Ol O'zinin' Yahudag'a qarsı lawlag'an g'a'zebinen waz keshpedi.
27 Jaratqan İye bılay dedi: «İzraildı da'rgayımnan qalay quwıp shıg'arg'an bolsam, Yahudanı da solay quwıp shıg'araman. Tan'lap alg'an qalam Erusalimnen ha'm „atım sol jerde boladı“ degen İbadatxanadan ju'z buraman».
28 İoshiyanın' basqa isleri, ol islegen barlıq isler Yahuda patshalarının' jılnama kitabında jazılg'an.
29 İoshiyanın' hu'kimdarlıg'ı waqtında, Mısır faraonı Nexo Assiriya patshasına ja'rdem beriw ushın, Evfrat da'ryasına qaray jolg'a shıqtı. Patsha İoshiya da Nexog'a qarsı ju'ris qıldı ha'm olar Megiddoda duslasqanda Nexo İoshiyanı o'ltirdi.
30 Xızmetshileri İoshiyanın' denesin arbag'a salıp, Megiddodan Erusalimge alıp keldi ha'm o'z qa'birine jerledi. U'lke xalqı İoshiyanın' ulı Ehoaxazdı maylap, a'kesinin' ornına patsha etip qoydı.
31 Ehoaxaz jigirma u'sh jasında patsha bolıp, Erusalimde u'sh ay patshalıq etti. Onın' anasının' atı Xamutal bolıp, ol libnalı Eremiyanın' qızı edi.
32 Ehoaxaz ata-babaları sıyaqlı Jaratqan İyenin' na'zerinde jaman bolg'an islerdi isledi.
33 Ehoaxazdın' Erusalimde patshalıq etpewi ushın, faraon Nexo onı Xamat u'lkesinde, Riblada tutqıng'a aldı ha'm u'lke xalqına ju'z talant gu'mis ha'm bir talant altın salıq saldı.
34 Faraon Nexo İoshiyanın' ulı Elyakimdi a'kesinin' ornına patsha etip qoydı ha'm atın o'zgertip, Ehoyakim dep qoydı. Al Ehoaxazdı Mısırg'a alıp keldi ha'm ol sol jerde qaytıs boldı.
35 Ehoyakim faraon talap etken gu'mis ha'm altındı berdi. Bunın' ushın ol u'lke xalqına ha'r birinin' mal-mu'lkine say salıq salıp, xalıqtan gu'mis ha'm altın o'ndirip aldı.
36 Ehoyakim jigirma bes jasında patsha bolıp, Erusalimde on bir jıl patshalıq etti. Onın' anasının' atı Zebuda bolıp, ol rumalı Pedayanın' qızı edi.
37 Ehoyakim ata-babaları sıyaqlı, Jaratqan İyenin' na'zerinde jaman bolg'an islerdi isledi.
