4 Patshalar 22 bob
1 İoshiya segiz jasında patsha bolıp, Erusalimde otız bir jıl patshalıq etti. Onın' anasının' atı Edida bolıp, ol bosqatlı Adayanın' qızı edi.
2 İoshiya Jaratqan İyenin' na'zerinde tuwrı bolg'an islerdi isledi. Ol on'g'a da solg'a da burılmay, babası Dawıttın' jolınan ju'rdi.
3 Patsha İoshiya o'z patshalıg'ının' on segizinshi jılında, Meshullamnın' aqlıg'ı Asaliyanın' ulı xatker Shafandı Jaratqan İyenin' İbadatxanasına jiberip, og'an bılay dedi:
4 «Bas ruwxaniy Xilkiyag'a bar. Ol bosag'adag'ı qadag'alawshı ruwxaniyler xalıqtan jıynap, Jaratqan İyenin' İbadatxanasına alıp kelgen gu'mislerdi esaplap shıqsın.
5 Keyin onı Jaratqan İyenin' İbadatxanasının' ishindegi islerdi baqlaw ushın tayınlang'an adamlarg'a bersin. Olar bunı Jaratqan İyenin' İbadatxanasının' buzılg'an jerlerin du'zetiwshilerge,
6 ustalarg'a, qurılısshılarg'a, tas qalawshılarg'a to'lesin ha'm İbadatxananı du'zetiwge kerekli bolg'an ag'ashlardı ha'm jonılg'an taslardı satıp alıwg'a jumsasın.
7 Degen menen, olarg'a berilgen gu'mistin' esabı talap etilmesin, o'ytkeni olar hadal isleydi».
8 Bas ruwxaniy Xilkiya xatker Shafang'a: «Men Jaratqan İyenin' İbadatxanasınan Nızam kitabın taptım», – dep, kitaptı Shafang'a berdi. Shafan kitaptı oqıdı.
9 Son'ınan xatker Shafan patshag'a: «Qulların'ız İbadatxanadan tabılg'an gu'mislerdi alıp, onı Jaratqan İyenin' İbadatxanasındag'ı islerdi alıp barıwshılarg'a tapsırdı», – degen xabar alıp keldi.
10 Son'ınan ol: «Ruwxaniy Xilkiya mag'an bir kitap berdi», – dedi ha'm kitaptı patshag'a oqıp berdi.
11 Patsha Nızam kitabındag'ı so'zlerdi esitkende, kiyimlerin jırttı.
12 Ol ruwxaniy Xilkiyag'a, Shafan ulı Axiqamg'a, Mixaya ulı Axborg'a, xatker Shafang'a ha'm o'z xızmetshisi Asayag'a bılay dep buyırdı:
13 «Barıp, tabılg'an bul kitaptın' so'zleri haqqında men ushın, xalıq ushın ha'm pu'tkil Yahuda ushın Jaratqan İyenin' erkin soran'lar. Ata-babalarımızdın' bul kitaptın' so'zlerine qulaq aspag'anı ha'm onda bizler ushın jazılg'an bul so'zlerge say jasamag'anı sebepli, Jaratqan İyenin' bizlerge qarsı lawlag'an g'a'zebi ullı».
14 Ruwxaniy Xilkiya, Axiqam, Axbor, Shafan ha'm Asaya barıp, Xarxastın' aqlıg'ı Tiqwanın' ulı bolg'an muxaddes kiyimlerge qarawshı Shallumnın' hayalı payg'ambar Xulda menen so'ylesti. Xulda Erusalimnin' taza bo'liminde jasaytug'ın edi.
15 Hayal olarg'a bılay dedi: «İzraildın' Qudayı Jaratqan İye sizlerdi mag'an jibergen adamg'a bılay dep aytın'lar dep atır:
16 Jaratqan İye bılay deydi: „Yahuda patshasının' oqıg'an kitabında jazılg'anınday, bul jerge de, bul jerde jasaytug'ın xalıqtın' basına da apatshılıq jawdıraman.
17 Olar meni ta'rk etti ha'm basqa qudaylarg'a tu'tetki tu'tetip, pu'tkil isleri menen Menin' g'a'zebimdi keltirdi. Sonlıqtan bul jerge qarsı g'a'zebim lawladı ha'm ol so'nbeydi.
18 Jaratqan İyeden soraw ushın sizlerdi jibergen Yahuda patshasına bılay dep aytın'lar: sen esitken so'zler tuwralı İzraildın' Qudayı Jaratqan İye bılay deydi:
19 Bul jer ha'm bul jerde jasaytug'ınlardın' wayran etiliwge ha'm na'letke hu'kim etilgeni haqqında Menin' so'zlerimdi esitkende, ju'regin' ezildi ha'm Mag'an boysındın'. Sen kiyimlerin'di jırtıp, Menin' aldımda jılag'anlıqtan, Men de seni esittim.
20 Sonlıqtan Men seni ata-babaların'a qosaman, tınıshlıq penen qa'birge qoyılasan'. Men bul jerge jawdıratug'ın hesh bir apatshılıqtı senin' ko'zin' ko'rmeydi“». Olar bul xabardı patshag'a jetkizdi.
