4 Patshalar 20 bob
1 Sol ku'nleri Xizkiya awırıp, o'lim to'seginde jattı. Sonda Amos ulı İyshaya payg'ambar og'an kelip bılay dedi: «Jaratqan İye bılay deydi: „U'y-ishin'e wa'siyatnaman'dı qaldırıp, ırzalasa ber, sebebi ta'wir bolmaysan', o'lesen'“».
2 Xizkiya ju'zin diywalg'a qaratıp, Jaratqan İyege duwa etip:
3 «O, Jaratqan İye! Aldın'da menin' shın ju'rekten sadıqlıq penen jasag'anımdı ha'm na'zerin'de tuwrı islerdi islep ju'rgenimdi esley go'r!» – dedi ha'm o'ksip-o'ksip jıladı.
4 İyshaya ele saraydın' ortang'ı ha'wlisinen shıg'ıp ketpey atırıp, og'an Jaratqan İyeden mınaday so'z tu'sti:
5 «İzin'e qaytıp, Menin' xalqımnın' hu'kimdarı Xizkiyag'a mına xabardı jetkiz: „Baban' Dawıttın' Qudayı Jaratqan İye bılay deydi: Duwan'dı esittim, ko'z jasların'dı ko'rdim. Mine, Men seni shıpalayman. Sen u'shinshi ku'ni Jaratqan İyenin' İbadatxanasına barasan'.
6 O'mirin'di on bes jılg'a uzaytaman. O'zin'di de, bul qalanı da Assiriya patshasının' qolınan qutqaraman. O'zim ushın ha'm qulım Dawıttın' hu'rmeti ushın bul qalanı qorg'ayman“».
7 İyshaya patshanın' adamlarına: «Keptirip nıg'ızlang'an a'njir alıp kelin'ler», – dedi. Onı a'kelip, jarag'a qoyg'anda, ol sawalıp ketti.
8 Xizkiya İyshayadan: – Jaratqan İyenin' meni sawaltatug'ının ha'm u'shinshi ku'ni Jaratqan İyenin' İbadatxanasına baratug'ınımdı qanday belgi arqalı bilemen? – dep soradı.
9 9 İyshaya og'an: – Jaratqan İyenin' O'z so'zin orınlaytug'ının bildiretug'ın belgi mınaw: tekshege tu'sip turg'an saya on adım aldıg'a jıljısın ba yamasa on adım artqa jıljısın ba? – dedi
10 Xizkiya İyshayag'a: – Sayanın' aldıg'a on adım jıljıwı an'sat. Saya on adım artqa jıljısın, – dedi.
11 yshaya payg'ambar Jaratqan İyege jalbarındı. Sonda Jaratqan İye patsha Axaz soqtırg'an tekshenin' u'stine tu'sip turg'an sayanı on adım artqa jıljıttı.
12 Sol arada Xizkiyanın' awırıp qalg'anın esitken Babilon patshası Baladan ulı Merodax-Baladan Xizkiyag'a xatlar ha'm sawg'alar jiberdi.
13 Xizkiya elshilerdi qabıl etti ha'm olarg'a o'z qaznasındag'ı zatlardın' ha'mmesin: gu'mis ha'm altınların, xosh iyisli zatların, qımbatbaha mayların, qural-jaraq saqlanatug'ın bo'lmesin ko'rsetti. Xizkiyanın' sarayında da, patshalıg'ında da olarg'a ko'rsetilmegen hesh na'rse qalmadı.
14 Sonda payg'ambar İyshaya patsha Xizkiyanın' janına kelip, og'an: – Bul adamlar sizge ne dedi? Olar qay jaqtan kelipti? – dep soradı. Xizkiya og'an: – Olar uzaq elden, Babilonnan kelgen, – dep juwap berdi.
15 İyshaya: – Olar sarayın'ızda ne ko'rdi? – dep soradı. Xizkiya: – Sarayımdag'ı ha'mme na'rseni ko'rdi. Qaznamda olarg'a ko'rsetpegen hesh na'rsem qalmadı, – dep juwap berdi.
16 Sonda İyshaya Xizkiyag'a bılay dedi: – Onda Jaratqan İyenin' so'zin esitin':
17 «Jaratqan İye bılay deydi: „Sarayın'dag'ı ha'mme na'rse ha'm ata-babaların'nın' usı ku'nge shekem jıynag'an ha'mme na'rsesi Babilong'a alıp ketiletug'ın ku'n keledi, hesh na'rse qalmaydı.
18 Senin' na'silin'nen bolg'an ayırım urpaqların' da alıp ketilip, Babilon patshasının' sarayında xızmetshi boladı“».
19 Xizkiya İyshayag'a: – Jaratqan İyenin' siz arqalı aytqan so'zleri jaqsı so'zler, – dedi. Sebebi ol ishinen: «Hesh bolmag'anda menin' zamanımda tınıshlıq ha'm abadanshılıq boladı», – dep oyladı.
20 Xizkiyanın' basqa isleri, barlıq qaharmanlıqları, ol qurg'ızg'an hawız, suw o'tkelleri ha'm qalag'a qalay suw aparg'anları Yahuda patshalarının' jılnama kitabında jazılg'an.
21 Xizkiya o'lip, ata-babalarına qosıldı. Onın' ornına ulı Menashshe patsha boldı.
