4 Patshalar 2 bob
1 Jaratqan İye İliyastı quyın ishinde aspang'a ko'terip alıp ketpesten aldın, İliyas penen Elisha Gilgaldan jolg'a shıqqan edi.
2 Sonda İliyas Elishag'a: – O'tinemen, usı jerde qal, Jaratqan İye meni Beyt-Elge jiberip atır, – dedi. Elisha og'an: – Tiri Jaratqan İye haqı ha'm sizin' tiriligin'iz haqı ant ishemen: sizden ayırılmayman, – dep juwap berdi. So'ytip olar birge Beyt-Elge ketti.
3 Beyt-Eldegi payg'ambarlar toparı Elishanın' aldınan shıg'ıp, onnan: – Jaratqan İye bu'gin mırzan'dı qasın'nan alıp ketedi, bunı bilesen' be? – dep soradı. Elisha olarg'a: – Awa, bilemen, u'ndemen'ler, – dedi.
4 İliyas Elishag'a: – Elisha, o'tinemen, usı jerde qal, Jaratqan İye meni Erixog'a jiberip atır, – dedi. Elisha og'an: – Tiri Jaratqan İye haqı ha'm sizin' tiriligin'iz haqı ant ishemen: sizden ayırılmayman, – dedi. So'ytip olar Erixog'a keldi.
5 Sonda Erixodag'ı payg'ambarlar toparı Elishag'a kelip: – Jaratqan İye bu'gin mırzan'dı qasın'nan alıp ketedi, bunı bilesen' be? – dep soradı. Elisha olarg'a: – Awa, bilemen, u'ndemen'ler, – dedi.
6 Keyin İliyas Elishag'a: – O'tinemen, sen usı jerde qal, sebebi Jaratqan İye meni İordan da'ryasına jiberip atır, – dedi. Elisha og'an: – Tiri Jaratqan İye haqı ha'm sizin' tiriligin'iz haqı ant ishemen: sizden ayırılmayman, – dedi. Solay etip, ekewi jolın dawam etti.
7 Payg'ambarlar toparınan eliwi kelip, uzag'ıraqtan olarg'a qarap turdı. Al olar ekewi İordan da'ryasının' jag'asında turdı.
8 İliyas shapanın alıp, aylandırıp, suwg'a urıp jibergende, suw ekige ayırıldı. Olar ekewi qurg'aq jer arqalı arg'ı jag'ag'a o'tt.
9 Da'ryadan o'tip bolg'annan son', İliyas Elishadan: – Meni janın'nan alıp ketpesten burın ayt, mennen qanday tilegin' bar? – dep soradı. Sonda Elisha: – Mende sizdegi ruwxtın' eki esesi bolsın, – dedi.
10 İliyas og'an: – Qıyın na'rseni soradın'. Eger janın'nan menin' qalay alıp ketilgenimdi ko'rsen', onda solay boladı. Eger ko'rmesen', olay bolmaydı, – dedi
11 Olar jolda so'ylesip ketip baratırg'anda, tosattan otlı arbag'a jegilgen otlı atlar ko'rindi ha'm olardı bir-birinen ayırdı. İliyas quyın ishinde aspang'a ko'terilip ketti.
12 Elisha bunı ko'rip: «A'kem, a'kem, İzraildın' arbası ha'm atlıları!» – dep qıshqırıp qala berdi. Elisha İliyastı qaytıp ko're almaytug'ın bolg'anlıqtan, kiyimlerin jırtıp, ekige ayırdı.
13 Son'ınan İliyastan tu'sip qalg'an shapandı alıp, izine qayttı ha'm İordan da'ryasının' jag'asına kelip turdı.
14 Ol İliyastan tu'sip qalg'an shapan menen suwdı urıp: «İliyastın' Qudayı, Jaratqan İye qay jerdesen'?» – dedi. Keyin ol suwdı qaytadan urg'anda, suw qaq ayırılıp, Elisha sol jerden kesip o'tti.
15 Erixodag'ı payg'ambarlar toparı uzaqtan Elishanı ko'rgende: «İliyastın' ruwxı Elishag'a tu'sti», – desti. Olar barıp, Elishanı ku'tip aldı ha'm basları jerge tiygenshe iyilip og'an ta'jim etti.
16 Keyin olar Elishag'a: – Janımızda eliw ku'shli adam bar. Ruxsat berin', olar barıp, mırzan'ızdı izlep kelsin. Ba'lkim, Jaratqan İyenin' Ruwxı onı ko'terip a'ketip, qanday da bir tawg'a yamasa oypatlıqqa aparıp taslag'an shıg'ar, – dedi. Biraq Elisha olarg'a: – Yaq, olardı izlewge jibermen'ler, – dedi.
17 Degen menen, payg'ambarlar jalınıp qoymay, biyzar qılg'annan son', Elisha izlewge ruxsat berdi. Payg'ambarlar eliw adamdı jiberdi. Olar u'sh ku'n izlep, İliyastı taba almadı.
18 Keyin Erixog'a, Elishanın' qasına qaytıp keldi. Elisha olarg'a: «Men sizlerge onı izlemen'ler degen joq pa edim?» – dedi.
19 Erixolılar Elishag'a: – Mırzamız, o'zin'iz ko'rip turg'anday, qalanın' turg'an jeri jaqsı, biraq suwı jaman, jeri de o'nimsiz, – dedi.
20 Elisha olarg'a: – Taza bir kesege duz salıp, mag'an alıp kelin'ler, – dedi. Olar solay isledi.
21 Elisha bulaq basına barıp, duzdı suwg'a tasladı da, bılay dedi: «Jaratqan İye bılay deydi: „Men bul suwdı taza qıldım, onnan endi o'lim de, o'nimsizlik te kelip shıqpaydı“».
22 Elishanın' aytqan so'zi boyınsha, suw ha'zirge deyin ishiwge jaramlı.
23 Elisha sol jerden Beyt-Elge ketti. Ol jolda ketip baratırg'anda, qaladan kishkene balalar shıg'ıp: «Joq bol, taz, joq bol!» – dep masqaralay basladı
24 Ol artına qarap, balalardı ko'rdi ha'm olardı Jaratqan İyenin' atı menen g'arg'adı. Sonda tog'aydan eki urg'ashı ayıw shıg'ıp, qırıq eki balanı tilkimlep tasladı.
25 Elisha ol jerden Karmel tawına, Karmel tawınan Samariyag'a qayttı.
