4 Patshalar 19 bob
1 Patsha Xizkiya bulardı esitkende, kiyimlerin jırttı ha'm aza kiyimlerin kiyip, Jaratqan İyenin' İbadatxanasına bardı.
2 Ol aza kiyimin kiygen saray basqarıwshısı Elyakimdi, xatker Shebnanı ha'm jası u'lken ruwxaniylerdi Amos ulı payg'ambar İyshayag'a jiberdi.
3 Olar İyshayag'a bılay dedi: «Xizkiya bılay deydi: „Bu'gingi ku'n azap, jaza ha'm masqarashılıq ku'ni. Sebebi bala shıg'ayın dep awızg'a taqalıp turg'anı menen, tuwıwg'a ku'shi joq hayalg'a uqsaymız.
4 Ba'lkim, tiri Qudaydı xorlaw ushın mırzası, Assiriya patshası jibergen bas wa'zirinin' barlıq so'zlerin Qudayın' Jaratqan İye esitken shıg'ar ha'm usı esitken so'zleri ushın olardı jazalar. Sonlıqtan tiri qalg'anlar ushın duwa et“».
5 Patsha Xizkiyanın' xızmetshileri patshanın' so'zlerin İyshayag'a jetkizgende,
6 İyshaya olarg'a bılay dedi: «Mırzan'ızg'a bılay dep aytın'lar: Jaratqan İye bılay deydi: „Assiriya patshasının' xızmetshilerinin' Meni masqaralap aytqan so'zlerinen, yag'nıy o'zin' esitken so'zlerden qorqpa.
7 Mine, Men og'an bir ruwx jiberemen. Sonda ol bir xabar esitip, o'z eline qaytıp ketedi. Men onı o'z elinde qılısh penen o'ltirtemen“».
8 Assiriya patshasının' bas wa'ziri izine qaytıp, o'z patshasın Libna qalasına qarsı urısıp atırg'an jerinen taptı. Sebebi ol Assiriya patshasının' Laxishten shegingenin esitken edi.
9 Assiriya patshası Kush patshası Tirhaqanın' o'zine qarsı urısqa atlang'anın esitip, Xizkiyag'a ja'ne elshilerin jiberip bılay dedi:
10 «Yahuda patshası Xizkiyag'a bılay dep aytın'lar: „Su'yengen Qudayın' seni: „Erusalim Assiriya patshasına ta'slim bolmaydı“, – dep aldamasın.
11 Assiriya patshalarının' barlıq ellerdi jer menen jeksen etip, neler islegenin esitken shıg'arsan'?! Endi sen qutılıp qalmaqshımısan'?
12 Ata-babalarım wayran etken Gozan, Xaran, Resef ha'm Telassardag'ı Edende jasag'an xalıqlardın' qudayları olardı qutqara aldı ma?
13 Xamat ha'm Arpad patshaları qa'ne? Sefarwayım, Hena ha'm İwwa qalalarının' patshaları qa'ne?“»
14 Xizkiya xattı elshilerdin' qolınan alıp oqıg'annan son', Jaratqan İyenin' İbadatxanasına bardı ha'm xattı Jaratqan İyenin' aldına jayıp qoydı.
15 Keyin Jaratqan İyenin' aldında duwa etip, bılay dedi: «Kerublar ortasındag'ı taxtta otırg'an İzraildın' Qudayı Jaratqan İye! Sen pu'tkil du'nya patshalıqlarının' jalg'ız Qudayısan'! Aspan ha'm jerdi Sen jaratqansan'.
16 aratqan İye, qulaq salıp, esit, ko'zlerin'di ashıp, ko'r. Tiri Qudaydı masqaralaw ushın Sanxeribtin' aytıp jibergen so'zlerin esit.
17 Jaratqan İye, ırasında da, Assiriya patshaları xalıqlardı ha'm olardın' jerlerin wayranladı.
18 Olardın' qudayların otqa taslap, joq qıldı. Biraq olar haqıyqatında qudaylar emes, al ag'ashtan ha'm tastan adam qolı menen islengen na'rseler edi.
19 Qudayımız Jaratqan İye, bizlerdi Sanxeribtin' qolınan qutqara go'r. Sonda pu'tkil du'nya patshalıqları Senin' jalg'ız Quday ekenin'di biledi».
20 Son'ınan Amos ulı İyshaya payg'ambar Xizkiyag'a mınaday xabar jiberdi: «İzraildın' Qudayı Jaratqan İye bılay deydi: Assiriya patshası Sanxerib haqqında Mag'an etken duwan'dı esittim.
21 Ol tuwralı Men, Jaratqan İye bılay deymen: Pa'k qız Sion seni kemsitip, u'stin'nen ku'ler, Erusalim qız mazaqlap, izin'nen bas shayqar.
22 Sen kimdi xorlap, kimdi mazaqladın'? Kimge dawıs ko'terip so'ylep, kimge menmensip qaradın'? Mag'an – İzraildın' Muxaddesine!
23 Elshilerin' arqalı Meni xorlap bılay dedin': „Sansız sawash arbalarım menen tawlardın' biyik shın'ına, Lebanon tawlarının' uzaq janbawırlarına shıqtım, Biyik kedr ag'ashların, jaqsı sa'rwi ag'ashların kestim. Onın' en' to'rine, en' qalın' tog'ayına bardım.
24 Men qudıqlar qazdım ha'm jat ellerdin' suwların ishtim, Mısırdın' barlıq da'ryaların tabanım menen qurıttım“.
25 Biraq bunın' ha'mmesin burınnan jobalastırıp, a'yyemgi ku'nlerden oylap qoyg'anımdı esitpegen be edin'? Ha'zir Men sonı orınladım. Sonlıqtan sen qorg'anlı qalalardı qarabaqanag'a aylandıra aldın.
26 Sonda qol-qanatı qırqıldı qala xalqının', Qorqıp, uyatqa qaldı. Olar daladag'ı ko'k sho'pke, jan'a shıqqan na'zik sho'pke ha'm tamnın' basındag'ı, shıqpay atırıp o'rt shalg'an sho'pke uqsap qaldı.
27 Men senin' otırıs-turısın'dı, qashan kelip-ketetug'ının'dı, Mag'an degen g'a'zebin'di, ha'mmesin bilemen.
28 Mag'an degen g'a'zebin' ushın ha'm ta'kabbirligin' qulag'ıma jetip kelgeni ushın, Halqamdı murnın'nan o'tkizip, suwlıg'ımdı awzın'a tag'aman. Seni kelgen jolın' menen izin'e qaytaraman.
29 Ha'y, Xizkiya! Sen ushın belgi mınaw boladı: Usı jılı shashılg'an da'nnen o'sken o'nimdi jeysiz, Kelesi jılı sonın' ornına o'sken o'nimdi azıq qılasız, Al u'shinshi jılı da'n sewip, o'nim alasız, ju'zim bag'ların otırg'ızıp, olardın' miywesinen jeysiz.
30 Yahuda xalqının' qutılıp qalg'anları jerge tamır jayıp, joqarıda miywe beredi.
31 Sebebi tiri qalg'anlar Erusalimnen, qutılg'anlar Sion tawınan kelip shıg'adı. Bunı A'lemnin' Jaratqan İyesi O'z qızg'anshaqlıg'ı menen ju'zege asıradı.
32 Sonlıqtan Jaratqan İye Assiriya patshası tuwralı bılay deydi: Ol bul qalag'a kirmeydi, oq ta atpaydı, Qalag'a jaqınlamas qalqanı menen, Qalag'a qarsı topıraq ta u'ydirmeydi.
33 Kelgen jolı menen qaytadı, qalag'a kirmeydi. Bul – Jaratqan İyenin' aytqanı!
34 Men O'zim ushın ha'm qulım Dawıttın' hu'rmeti ushın bul qalanı qorg'ap, qutqaraman».
35 Sol ku'ni tu'nde Jaratqan İyenin' perishtesi assiriyalılardın' ordasına barıp, bir ju'z seksen bes mın' adamdı qırıp tasladı. Azanda oyanıp qarag'anlar ha'mme jerdin' o'liklerge tolıp ketkenin ko'rdi.
36 Sonda Assiriya patshası Sanxerib ordanı taslap, izine qayttı. Ol Nineviyag'a qaytıp kelip, sol jerde jasap qaldı.
37 Bir ku'ni ol o'z qudayı Nisroxtın' butxanasında tabınıp atırg'anda, ulları Adrammelex penen Sareser onı qılısh penen o'ltirdi ha'm o'zleri Ararat u'lkesine qashıp ketti. Sanxeribtin' ornına ulı Esar-Xaddon patsha boldı.
