4 Patshalar 16 bob

Yahuda patshası Axaz(1-20).

¹ İzrail patshası Remaliya ulı Peqaxtın' patshalıg'ının' on jetinshi jılında, İotam ulı Axaz Yahudag'a patsha boldı.

² Axaz jigirma jasında patsha bolıp, Erusalimde on altı jıl patshalıq etti. Ol Qudayı Jaratqan İyenin' na'zerinde tuwrı bolg'an islerdi islegen babası Dawıtqa uqsamadı.

³ Axaz İzrail patshalarının' jolınan ju'rdi. Ha'tte, Jaratqan İye İzrail xalqının' aldınan quwıp jibergen milletlerdin' jerkenishli da'stu'rlerine eliklep, o'z ulın otqa jag'ıp, qurban etti.

⁴ Ol sıyınıw orınlarında, ha'r bir biyiklikte ha'm qoyıw japıraqlı terektin' astında qurbanlıqlar berip, tu'tetkiler tu'tetti.

⁵ Sonda Aram patshası Resin ha'm İzrail patshası Remaliya ulı Peqax Erusalimdi basıp alıw ushın hu'jim etti. Olar qalanı qamal qılıp tursa da, Axazdı jen'e almadı.

⁶ Sol arada Aram patshası Resin Elat qalasın qaytarıp alıp, ol jerdegi Yahuda xalqın quwıp jiberdi. Son'ınan edomlılar Elatqa qonıs bastı, olar ha'zir de sol jerde jasaydı.

⁷ Axaz Assiriya patshası Tiglat-Pileserge elshilerin jiberip: «Men sizin' qulın'ız ha'm xızmetshin'izben. Kelip, mag'an hu'jim etip atırg'an Aram ha'm İzrail patshalarının' qolınan meni qutqarın'», – dedi.

⁸ Axaz Jaratqan İyenin' İbadatxanasınan ha'm saraydın' qaznasınan tabılg'an gu'mis ha'm altınlardı alıp, Assiriya patshasına sawg'ag'a berip jiberdi.

⁹ Assiriya patshası Axazdın' tilegin orınlap, Damaskke hu'jim etip, onı qolg'a kirgizdi. Qala xalqın Kirge su'rgin qılıp, Resindi o'ltirdi.

¹⁰ Patsha Axaz Assiriya patshası Tiglat-Pileserdi qarsı alıw ushın Damaskke barg'anda, sol jerdegi qurbanlıq orındı ko'rdi. Ol qurbanlıq orınnın' su'wretin ha'm qurılısının' sızılmasın ruwxaniy Uriyag'a jiberdi.

¹¹ Ruwxaniy Uriya patsha Axaz Damaskten kelgenshe, Damaskten ol jibergen u'lgi boyınsha, qurbanlıq orın qurdırıp qoydı.

¹² Patsha Damaskten qaytıp kelgende, qurbanlıq orındı ko'rdi ha'm og'an jaqınlap, u'stinde qurbanlıqlar berdi.

¹³ Ol qurbanlıq orında jandırılatug'ın qurbanlıg'ın ha'm g'a'lle sadaqasın tu'tetip jandırdı, og'an ishimlik sadaqasın quyıp, tatıwlıq qurbanlıg'ının' qanın septi.

¹⁴ Al Jaratqan İyenin' aldındag'ı qoladan islengen qurbanlıq orındı İbadatxananın' aldınan, yag'nıy taza qurbanlıq orın menen İbadatxana ortasında turg'an ornınan jıljıtıp, onı jan'a qurbanlıq orınnın' arqa ta'repine qoydı.

¹⁵ Son'ınan patsha Axaz ruwxaniy Uriyag'a mınaday buyrıq berdi: «Azang'ı jandırılatug'ın qurbanlıqtı ha'm keshki g'a'lle sadaqasın, patsha bergen jandırılatug'ın qurbanlıqtı ha'm g'a'lle sadaqasın, u'lke xalqı bergen jandırılatug'ın qurbanlıqtı, g'a'lle sadaqasın ha'm ishimlik sadaqasın u'lken qurbanlıq orında usın. Jandırılatug'ın qurbanlıqlardın' ha'm basqa qurbanlıqlardın' ha'mmesinin' qanın og'an sep. Al qoladan islengen qurbanlıq orındı men keleshekti biliw ushın qollanaman».

¹⁶ Ruwxaniy Uriya patsha Axazdın' buyrıqların tolıq orınladı.

¹⁷ Patsha Axaz tu'beldiriklerdin' taxtaların kestirip, u'stindegi la'genlerdi aldırıp tasladı. Hawızdı da qola bug'alardın' u'stinen tu'sirip, to'selgen tastın' u'stine qoydı.

¹⁸ Assiriya patshasına jag'ınıw ushın, ol Shabbat ku'nleri Jaratqan İyenin' İbadatxanasına kiretug'ın u'sti jabıq joldı ha'm patsha kiretug'ın qapını jawıp tasladı.

¹⁹ Axazdın' basqa isleri haqqında Yahuda patshalarının' jılnama kitabında jazılg'an.

²⁰ Axaz o'lip, ata-babalarına qosıldı ha'm Dawıttın' qalasına, ata-babalarının' janına jerlendi. Onın' ornına ulı Xizkiya patsha boldı.