4 Patshalar 15 bob

Yahuda patshası Azariya(1-7),İzrail patshası Zexariya(8-12),İzrail patshası Shallum(13-16),İzrail patshası Menaxem(17-22),zrail patshası Peqaxiya(23-26),İzrail patshası Peqax(27-31),Yahuda patshası İotam(32-38).

¹ İzrail patshası Yarobamnın' patshalıg'ının' jigirma jetinshi jılında, Yahuda patshası Amasiyanın' ulı Azariya* Yahudag'a patsha boldı.

² Azariya on altı jasında taxtqa otırıp, Erusalimde eliw eki jıl patshalıq etti. Onın' anası erusalimli bolıp, atı Exoliya edi.

³ Azariya da a'kesi Amasiyag'a uqsap, Jaratqan İyenin' na'zerinde tuwrı bolg'an islerdi isledi.

⁴ Biraq sıyınıw orınları alıp taslanbadı ha'm xalıq sol jerlerde qurbanlıqlar berip, tu'tetkiler tu'tetiwin dawam etti.

⁵ Jaratqan İye patsha Azariyanı jazaladı. Ol bir o'mir jaman teri keselligine shalınıp, bo'lek bir u'yde jasadı. Saraydı ha'm u'lke xalqın onın' ulı İotam basqardı.

⁶ Azariyanın' basqa isleri ha'm ol islegen barlıq isler Yahuda patshalarının' jılnama kitabında jazılg'an.

⁷ Azariya o'lip, ata-babalarına qosıldı ha'm Dawıttın' qalasındag'ı ata-babalarının' janına jerlendi. Onın' ornına ulı İotam patsha boldı.

⁸ Yahuda patshası Azariyanın' patshalıg'ının' otız segizinshi jılında, Yarobam ulı Zexariya Samariyada İzrailg'a patsha boldı ha'm altı ay patshalıq etti.

⁹ Ata-babaları sıyaqlı, ol Jaratqan İyenin' na'zerinde jaman bolg'an islerdi isledi ha'm Nabat ulı Yarobamnın' İzraildı baslag'an gu'nalarınan bas tartpadı.

¹⁰ Yabesh ulı Shallum Zexariyag'a qarsı til biriktirip, onı xalıqtın' aldında o'ltirdi ha'm ornına o'zi patsha boldı.

¹¹ Zexariyanın' basqa isleri İzrail patshalarının' jılnama kitabında jazılg'an.

¹² Solay etip, Jaratqan İyenin' Ehug'a: «Senin' na'silin' to'rtinshi a'wladqa deyin İzrail taxtında otıradı», – dep aytqan so'zi orınlandı.

¹³ Yahuda patshası Uzziyanın' patshalıg'ının' otız tog'ızınshı jılında, Yabesh ulı Shallum İzrailg'a patsha boldı ha'm Samariyada bir ay patshalıq.

¹⁴ Gad ulı Menaxem Tirsadan Samariyag'a kelip, sol jerde Yabesh ulı Shallumdı o'ltirdi ha'm onın' ornına o'zi patsha bolıp aldı.

¹⁵ Shallumnın' basqa isleri ha'm ol du'zgen qastıyanshılıq İzrail patshalarının' jılnama kitabında jazılg'an.

¹⁶ Sol waqıtta Menaxem Tirsadan shıg'ıp, o'zine da'rwazaların ashpag'anı ushın, Tifsax qalasın ha'm onın' a'tirapındag'ı awıllardın' ha'mmesin qırdı ha'm ha'miledar hayallardın' qarınların jarıp tasladı

¹⁷ Yahuda patshası Azariyanın' patshalıg'ının' otız tog'ızınshı jılında, Gad ulı Menaxem İzrailg'a patsha bolıp, Samariyada on jıl patshalıq etti.

¹⁸ Ol Jaratqan İyenin' na'zerinde jaman bolg'an islerdi isledi ha'm o'miri boyı Nabat ulı Yarobamnın' İzraildı baslag'an gu'nalarınan ju'z burmadı.

¹⁹ Assiriya patshası Pul İzrailg'a hu'jim etti. Biraq Menaxem Puldın' qollap-quwatlawına erisiw arqalı o'z patshalıg'ın bekkemlew ushın, Pulg'a mın' talant gu'mis berdi.

²⁰ Menaxem Assiriya patshasına beriw ushın, İzraildag'ı bay adamlardın' ha'r birine eliw shekel gu'misten salıq saldı. Solay etip, Assiriya patshası elden sheginip, o'z u'lkesine qaytıp ketti.

²¹ Menaxemnin' basqa isleri ha'm ol islegen barlıq isler İzrail patshalarının' jılnama kitabında jazılg'an.

²² Menaxem o'lip, ata-babalarına qosıldı ha'm onın' ornına ulı Peqaxiya patsha boldı.

²³ Yahuda patshası Azariyanın' patshalıg'ının' eliwinshi jılında, Menaxem ulı Peqaxiya Samariyada İzrailg'a patsha boldı ha'm eki jıl patshalıq etti.

²⁴ Peqaxiya Jaratqan İyenin' na'zerinde jaman bolg'an islerdi isledi ha'm Nabat ulı Yarobamnın' İzraildı baslag'an gu'nalarınan bas tartpadı.

²⁵ Peqaxiyanın' a'skerbasılarınan biri Remaliya ulı Peqax og'an qarsı til biriktirdi. Ol janına giladlı eliw adamdı alıp, Argob ha'm Arye degen adamlar menen birikti de, Samariyadag'ı saraydın' qorg'anında Peqaxiyanı o'ltirip, ornına o'zi patsha boldı.

²⁶ Peqaxiyanın' basqa isleri ha'm ol islegen barlıq isler İzrail patshalarının' jılnama kitabında jazılg'an.

²⁷ Yahuda patshası Azariyanın' patshalıg'ının' eliw ekinshi jılında, Remaliya ulı Peqax Samariyada İzrailg'a patsha boldı ha'm jigirma jıl patshalıq etti.

²⁸ Ol Jaratqan İyenin' na'zerinde jaman bolg'an islerdi isledi ha'm Nabat ulı Yarobamnın' İzraildı baslag'an gu'nalarınan ju'z burmadı.

²⁹ İzrail patshası Peqaxtın' da'wirinde, Assiriya patshası Tiglat-Pileser İzraildın' İyyon, Abel-Beyt-Maaxa, Yanoax, Kedesh, Xasor qalaların ha'm Gilad, Galila, Naftaliy u'lkelerin basıp alıp, xalqın Assiriyag'a aydap ketti.

³⁰ Yahuda patshası Uzziya ulı İotamnın' patshalıg'ının' jigirmalanshı jılında, Ela ulı Hoshea Remaliya ulı Peqaxqa qarsı til biriktirip, onı o'ltirdi ha'm ornına o'zi patsha boldı.

³¹ Peqaxtın' basqa isleri ha'm ol islegen barlıq isler İzrail patshalarının' jılnama kitabında jazılg'an.

³² İzrail patshası Remaliya ulı Peqaxtın' patshalıg'ının' ekinshi jılında, Uzziya ulı İotam Yahudag'a patsha boldı.

³³ İotam jigirma bes jasında patsha boldı ha'm Erusalimde on altı jıl patshalıq etti. Onın' anasının' atı Erusha bolıp, ol Sadoq degen adamnın' qızı edi.

³⁴ İotam da a'kesi Uzziyag'a uqsap, Jaratqan İyenin' na'zerinde tuwrı bolg'an islerdi isledi.

³⁵ Biraq sıyınıw orınları joq qılınbay, xalıq ol jerlerde ele qurbanlıqlar berip, tu'tetkiler tu'tetetug'ın edi. İotam Jaratqan İyenin' İbadatxanasının' joqarg'ı da'rwazasın saldırdı.

³⁶ İotamnın' basqa isleri ha'm ol islegen barlıq isler Yahuda patshalarının' jılnama kitabında jazılg'an.

³⁷ Sol ku'nlerde Jaratqan İye Aram patshası Resin menen İzrail patshası Remaliya ulı Peqaxtı Yahudag'a hu'jimge jibere basladı.

³⁸ İotam o'lip, ata-babalarına qosıldı ha'm babası Dawıttın' qalasına, ata-babalarının' janına jerlendi. Onın' ornına ulı Axaz patsha boldı.