4 Patshalar 14 bob

Yahuda patshası Amasiyanın' İzrail patshası Ehoashqa urıs ashıwı(1-16),Yahuda patshası Amasiyanın' o'limi(17-22),İzrail patshası Yarobam(23-29).

¹ İzrail patshası Ehoaxazdın' ulı Ehoashtın' patshalıg'ının' ekinshi jılında Yahuda patshası İoashtın' ulı Amasiya Yahuda taxtına otırdı.

² Amasiya patsha bolg'anda, jigirma bes jasında edi, ol Erusalimde jigirma tog'ız jıl patshalıq etti. Onın' anası erusalimli bolıp, atı Ehoaddan edi.

³ Amasiya Jaratqan İyenin' na'zerinde tuwrı bolg'an islerdi islese de, babası Dawıtqa uqsamadı. Al ha'r bir iste ol a'kesi İoashtan o'rnek aldı.

⁴ Ol da sıyınıw orınların joq qılmadı. Xalıq sol jerlerde qurbanlıqlar berip, tu'tetkiler tu'tetiwin dawam etti.

⁵ Amasiya o'zinin' patshalıq biyligin bekkemlep alg'annan son', a'kesi İoash patshanı o'ltirgen xızmetshilerdi o'ltirdi.

⁶ Biraq Muwsanın' Nızam kitabında jazılg'anına say is tutıp, jınayatshılardın' balaların o'ltirmedi. Onda Jaratqan İye: «Balalar ushın a'keler, a'keler ushın balalar o'ltirilmesin. Ha'r bir adam o'z gu'nası ushın o'ltirilsin», – dep buyırg'an edi.

⁷ Amasiya Duz oypatlıg'ında on mın' edomlını o'ltirip, Sela qalasın basıp aldı ha'm og'an İoqteel dep at qoydı. Bul qala ha'zir de sol at penen atalad.

⁸ Keyin Amasiya Ehudın' aqlıg'ı Ehoaxazdın' ulı İzrail patshası Ehoashqa xabarshılar jiberip: «Kel, jekpe-jek alısayıq», – dep shaqırıq tasladı.

⁹ zrail patshası Ehoash ta Yahuda patshası Amasiyag'a mınaday juwap jiberdi: «Lebanon tawlarındag'ı shat tiken sol jerdegi kedrge: „Qızın'dı menin' ulıma hayallıqqa ber“, – dep xabar jiberipti. Biraq Lebanon tawlarındag'ı bir jabayı haywan sol jerden o'tip baratırıp, shat tikendi jenship ketipti.

¹⁰ en edomlılardı jen'din', sonlıqtan ko'kiregin' a'laspanda. Usı jen'isin'di juwıp, u'yin'de otır. Ja'njel baslawdın' ne keregi bar? O'zin'nin' de, Yahudanın' da basın ba'lege qaldırajaqsan'».

¹¹ Degen menen, Amasiya qulaq aspadı. İzrail patshası Ehoash Yahuda patshası Amasiyag'a qarsı ju'ris qılıp, olar Yahudanın' Beyt-Shemesh qalasında ju'zbe-ju'z keldi.

¹² Yahudalılar izraillılar ta'repinen qıyratılıp, u'ylerine qaray qashtı.

¹³ İzrail patshası Ehoash Axaziyanın' aqlıg'ı İoashtın' ulı Yahuda patshası Amasiyanı Beyt-Shemeshte tutqıng'a aldı. Son'ınan Erusalimge kelip, qala diywalının' Efrayım da'rwazasınan Mu'yesh da'rwazasına shekemgi to'rt ju'z shıg'anaq aralıg'ın qulatıp tasladı.

¹⁴ Ol Jaratqan İyenin' İbadatxanasındag'ı ha'm patsha sarayındag'ı qaznadan tabılg'an ha'mme altın ha'm gu'mislerdi, ha'mme zatlardı, ja'ne de, kepilge qoyılatug'ın tutqınlardı alıp Samariyag'a qaytıp ketti.

¹⁵ Ehoashtın' basqa isleri, onın' qaharmanlıqları ha'm Yahuda patshası Amasiya menen qalay urısqanı İzrail patshalarının' jılnama kitabında jazılg'an.

¹⁶ Ehoash o'lip, ata-babalarına qosıldı ha'm Samariyag'a, İzrail patshalarının' janına jerlendi. Onın' ornına ulı Yarobam patsha boldı.

¹⁷ Yahuda patshası İoash ulı Amasiya İzrail patshası Ehoaxaz ulı Ehoashtın' o'liminen son', on bes jıl o'mir su'rdi.

¹⁸ Amasiyanın' basqa isleri Yahuda patshalarının' jılnama kitabında jazılg'an.

¹⁹ 9Erusalimde Amasiyag'a qarsı til biriktirilgenlikten, ol Laxishke qashtı. Biraq til biriktiriwshiler Amasiyanın' izinen Laxishke adam jiberip, onı sol jerde o'ltirtti.

²⁰ Olar Amasiyanın' denesin atqa artıp, Erusalimge alıp keldi ha'm ol Dawıttın' qalasına, ata-babalarının' janına jerlendi.

²¹ Yahuda xalqı on altı jasar Azariyanı a'kesi Amasiyanın' ornına patsha etip qoydı.

²² A'kesi Amasiyanın' o'liminen keyin, Azariya Elat qalasın Yahudag'a qaytarıp alıp, onı qaytadan qurdı.

²³ Yahuda patshası İoash ulı Amasiyanın' patshalıg'ının' on besinshi jılında, Ehoash ulı Yarobam Samariyada İzrailg'a patsha boldı ha'm qırıq bir jıl patshalıq etti.

²⁴ Yarobam Jaratqan İyenin' na'zerinde jaman bolg'an islerdi isledi ha'm Nabat ulı Yarobamnın' İzraildı baslag'an gu'nalarınan waz keshpedi.

²⁵ zraildın' Qudayı Jaratqan İyenin' O'z qulı gat-xeferli payg'ambar Amittay ulı Yunus arqalı aytqan so'zleri boyınsha, Yarobam Lebo-Xamattan O'li ten'izge* shekemgi İzrail jerlerin qayta tikledi.

²⁶ Sebebi Jaratqan İye İzrail xalqı tartıp atırg'an ku'shli azaptı ko'rdi. Qul da, azat adam da, ha'mmesi azap ishinde bolıp, olarg'a ja'rdem bergendey hesh kim joq edi.

²⁷ Jaratqan İye İzraildın' atın jer betinen joq qılıp jiberiwdi qa'lemegenlikten, Ehoash ulı Yarobam arqalı olardı qutqardı.

²⁸ Yarobamnın' basqa isleri, ol islegen barlıq isler, onın' qaharmanlıqları, qalay urısqanları ha'm Yahudag'a tiyisli bolg'an Damask penen Xamattı İzrailg'a qalay qaytarıp alg'anı haqqında İzrail patshalarının' jılnama kitabında jazılg'an.

²⁹ Yarobam o'lip, ata-babaları bolg'an İzrail patshalarına qosıldı. Onın' ornına ulı Zexariya patsha boldı.