3 Patshalar 1 bob
1 Patsha Dawıt qartayıp, biraz jasqa barıp qaldı. Onın' u'stine qansha ko'rpe jawsa da, ol hesh ısımadı.
2 Sonda xızmetshileri Dawıtqa: «Taqsır! Janın'ızda bolıp sizge qarawı, qoynın'ızg'a kirip sizdi ısıtıwı ushın jas bir qız tabayıq», – dedi.
3 Xızmetshiler pu'tkil İzraildı aralap, sulıw qız izledi ha'm shunemli Abishag degen jas ha'm sulıw bir qızdı tawıp, onı patshag'a alıp keldi.
4 Qız ju'da' go'zzal edi. Ol patshag'a qarap, og'an xızmet etti. Biraq patsha qızg'a jaqınlaspadı.
5 Dawıttın' Xaggit degen hayalınan tuwılg'an ulı Adoniya: «Men patsha bolaman», – dep ko'kirek ko'terip ju'rdi. Ol o'zine sawash arbaların, atlılardı ha'm aldında juwırıp ju'retug'ın eliw saqshı aldı.
6 A'kesi Dawıt hesh qashan og'an: «Nege bulay isledin'?» – dep, onı ta'rtipke shaqırıp turmaytug'ın edi. Adoniya Abshalomnan keyin tuwılg'an bolıp, ol da ju'da' sımbatı kelisken jigit edi.
7 Adoniya Seruya ulı İoab ha'm ruwxaniy Abiyatar menen ken'esti ha'm olar Adoniyanı qollap-quwatladı.
8 8Biraq ruwxaniy Sadoq, Ehoyada ulı Benaya, payg'ambar Natan, Shimey, Rey ha'm Dawıttın' ta'n saqshıları Adoniyag'a qosılmadı.
9 Adoniya Rogel bulag'ına jaqın jerdegi Zoxelet tasının' janında qoylar, bug'alar ha'm semirtilgen baspaqlardı qurbanlıqqa shaldı. Og'an o'zinin' pu'tkil tuwısqanların, yag'nıy patshanın' ulların ha'm patshag'a xızmet etetug'ın barlıq yahudalılardı mira't etti.
10 Biraq payg'ambar Natandı, Benayanı, patshanın' ta'n saqshıların ha'm tuwısqanı Sulaymandı mira't etpedi.
11 Sonda Natan Sulaymannın' anası Bat-Shebag'a bılay dedi: «Xaggitten tuwılg'an Adoniyanın' o'zin o'zi patsha dep ja'riyalag'anın esitpedin'iz be? Mırzamız Dawıttın' bunnan xabarı joq.
12 Endi o'zin'izdin' ha'm ulın'ız Sulaymannın' o'mirin qutqarıp qalıwın'ız ushın sizge bir ma'sla'ha't bereyin.
13 3Barıp, patsha Dawıttın' aldına kirin' ha'm og'an: „Taqsır, mennen son' senin' ulın' Sulayman patsha bolıp, menin' taxtıma otıradı, dep mag'an ant ishken joq pa edin'iz? Onda nege Adoniya patsha boldı?“ – dep aytın'.
14 Siz patsha menen so'ylesip atırg'anın'ızda, izin'izshe men de ishke kirip barıp, so'zlerin'izdi tastıyıqlayman».
15 Bat-Sheba patshanın' jataq jayına kirdi. Patsha qattı qartayg'an bolıp, shunemli Abishag og'an xızmet etip atırg'an edi.
16 Bat-Sheba jerge jıg'ılıp, patshag'a ta'jim etti. Patsha onnan: – Tilegin' ne? – dep soradı.
17 Bat-Sheba og'an bılay dep juwap berdi: – Taqsır! Siz: «Mennen keyin ulın' Sulayman patsha bolıp, taxtıma otıradı», – dep Qudayın'ız Jaratqan İyenin' atı menen mag'an ant bergen edin'iz.
18 Mine, ha'zir Adoniya patsha bolıp alg'an. Taqsır, bunnan sizin' xabarın'ız joq.
19 Ol bir qansha bug'alardı, semirtilgen baspaqlardı ha'm qoylardı qurbanlıqqa shaldı. Og'an patshanın' ha'mme ulların, ruwxaniy Abiyatardı ha'm sa'rka'rda İoabtı mira't etti. Biraq sizge xızmet etetug'ın ulın'ız Sulaymandı mira't etpedi.
20 Taqsır, pu'tkil İzraildın' ko'zi sizde. Olar o'zin'izden keyin taxtın'ızg'a kimnin' otıratug'ının bildiriwin'izdi ku'tip atır.
21 Bolmasa, siz du'nyadan o'tip, ata-babaların'ızg'a qosılg'anın'ızda, mag'an ha'm ulım Sulaymang'a ayıp tag'ıladı.
22 Bat-Sheba ele patsha menen so'ylesip turg'anda, payg'ambar Natan da keldi.
23 Patshag'a: «Payg'ambar Natan keldi», – dep xabarladı. Natan patshanın' aldına keldi de, et-betinen jıg'ılıp, ta'jim etti.
24 Son'ınan Natan bılay dedi: «Taqsır, siz: „Mennen keyin Adoniya patsha boladı, taxtıma ol otıradı“, – degen be edin'iz?
25 l bu'gin barıp, bir qansha bug'alardı, semirtilgen baspaqlardı ha'm qoylardı qurbanlıqqa shalıp, sizin' barlıq ulların'ızdı, ordadag'ı a'skerbasılardı ha'm ruwxaniy Abiyatardı mira't etti. Ha'zir ha'mmesi onın' menen iship-jep: „Jasasın, patsha Adoniya!“ – dep baqırısıp atır.
26 Biraq Adoniya meni, ruwxaniy Sadoqtı, Ehoyada ulı Benayanı ha'm sizge xızmet etetug'ın ulın'ız Sulaymandı mira't etpedi.
27 Taqsır, bulardın' ha'mmesi sizin' ruxsatın'ız benen bolıp atır ma? Ne ushın o'zin'izden keyin taxtın'ızg'a kimnin' otıratug'ının qulların'ız bolg'an bizlerge bildirmedin'iz?»
28 Patsha Dawıt: «Bat-Shebanı mag'an shaqırın'!» – dedi. Bat-Sheba kelip, patshanın' aldında turdı.
29 Patsha Bat-Shebag'a bılay dedi: – Meni barlıq ba'le-qadalardan qutqarg'an tiri Jaratqan İye haqı ant ishemen:
30 «Mennen keyin ulın' Sulayman patsha bolıp, taxtıma otıradı», – dep İzraildın' Qudayı Jaratqan İye aldında sag'an bergen antımdı bu'gin orınlayman.
31 Sonda Bat-Sheba et-betinen jıg'ılıp, patshag'a ta'jim etti de: – Mırzam Dawıt patsha ma'n'gi jasasın! – dedi.
32 Patsha Dawıt: «Ruwxaniy Sadoqtı, payg'ambar Natandı ha'm Ehoyada ulı Benayanı mag'an shaqırın'», – dedi. Olardın' ha'mmesi patshanın' aldına kelgende,
33 patsha olarg'a bılay dedi: «Menin' xızmetkerlerimdi janın'ızg'a alın' ha'm ulım Sulaymandı menin' g'ashırıma mindirip, Gixon bulag'ına aparın'.
34 Ol jerde ruwxaniy Sadoq ha'm payg'ambar Natan onı maylap, İzrailg'a patsha etip qoysın. Keyin ka'rnay shalıp: „Jasasın, patsha Sulayman!“ – dep jar salın'.
35 Son'ınan onın' izine erip, qaytıp kelin'. Ol kelip, menin' taxtıma otıradı ha'm menin' ornıma patsha boladı. Men onı İzrail ha'm Yahudag'a hu'kimdar etip tayınladım».
36 Ehoyada ulı Benaya patshag'a juwap berip bılay dedi: «Awmiyin. Taqsır, sizin' Qudayın'ız Jaratqan İye de bul qarardı qollap-quwatlasın.
37 Jaratqan İye siz benen birge bolg'anı sıyaqlı, Sulayman menen de birge bolsın ha'm onın' patshalıg'ın sizin' patshalıg'ın'ızdan da ullıraq qılsın!»
38 Ruwxaniy Sadoq, payg'ambar Natan, Ehoyada ulı Benaya ha'm keretler menen peletlerden alıng'an ta'n saqshılar Sulaymandı patsha Dawıttın' g'ashırına mindirip, onı Gixong'a alıp bardı.
39 Ruwxaniy Sadoq Muxaddes shatırdan za'ytu'n mayı quyılg'an shaqtı alıp, Sulaymannın' basına may quydı. Son'ınan olar ka'rnay shaldı ha'm ha'mme adamlar: «Jasasın, patsha Sulayman!» – dep baqırdı.
40 Xalıq Sulaymannın' izine erip ketti. Olardın' sırnay shalıp, ullı quwanısh penen baqırısqan dawıslarınan jer titiredi.
41 Adoniya ha'm onın' janındag'ı qonaqlar endi awqatların jep bolg'anda, usı dawıstı esitti. İoab ka'rnay dawısın esitkende: «Qalanı la'rzege keltirip atırg'an bul ne shawqım eken?» – dedi.
42 Ol ele so'ylep turg'anda, ruwxaniy Abiyatardın' ulı İonatan kelip qaldı. Adoniya og'an: – İshke kir, sen o'zin' sadıq adamsan', alıp kelgen xabarın' da jaqsı bolsa kerek, – dedi.
43 İonatan og'an bılay dep juwap berdi: – Yaq, bul ret basqasha. Mırzamız Dawıt patsha Sulaymandı patsha etip qoydı.
44 Patsha ruwxaniy Sadoqtı, payg'ambar Natandı, Ehoyada ulı Benayanı ha'm keretler menen peletlerden alıng'an ta'n saqshılardı Sulaymang'a qosıp jiberdi. Olar Sulaymandı patshanın' g'ashırına mindirdi.
45 Gixonda Sulayman ruwxaniy Sadoq ha'm payg'ambar Natan ta'repinen maylanıp, patsha etip qoyıldı. Olar sol jerden quwanısh penen qaytıp keldi ha'm qala janlanıp ketti. Esitip turg'anın'ız olardın' dawısları.
46 Sulayman ha'zir patshalıq taxtında otırıptı.
47 Bunnan tısqarı, patshamız Dawıttı qutlıqlawg'a kelgen xızmetshileri: «Qudayın'ız Sulaymannın' atın sizin' atın'ızdan ataqlıraq, al onın' patshalıg'ın sizin' patshalıg'ın'ızdan da ullıraq qılsın!», – degende, patsha to'seginde jatıp, ta'jim etip:
48 «Bu'gin ko'zimnin' tirisinde urpag'ımnan birin taxtıma otırg'ızg'anı ushın İzraildın' Qudayı Jaratqan İyege alg'ıslar bolsın!» – dedi.
49 Sonda Adoniyanın' qonaqlarının' ha'mmesin qorqıw basıp, orınlarınan turdı da, ha'r biri o'z jolına tu'sti.
50 Adoniya bolsa, Sulaymannan qorqqanınan ornınan turdı da, qurbanlıq orıng'a barıp, onın' shaqlarına jabıstı.
51 Bunı Sulaymang'a xabarlap: – Adoniya sizden qorqıp, qurbanlıq orınnın' shaqlarına jabısıp alg'an. Ol: «Da'slep patsha Sulayman qulı bolg'an meni qılısh penen o'ltirmeytug'ının aytıp ant ishsin», – dep atır, – dedi.
52 Sulayman olarg'a: – Eger ol mag'an sadıq adam bolsa, onın' shashının' bir talına da zıyan tiymeydi. Al eger ishinde qanday da bir jamanlıq bar bolsa, onda ol o'ltiriledi, – dep juwap berdi
53 Son'ınan patsha Sulayman jibergen adamlar Adoniyanı qurbanlıq orınnan alıp keldi. Adoniya kelip, patsha Sulaymang'a ta'jim etti. Sulayman og'an: «U'yin'e bar», – dedi.
