2 Patshalar 9 bob
1 Bir ku'ni Dawıt: «Shauldın' xojalıg'ınan tiri qalg'an bar ma? Men İonatannın' hu'rmeti ushın og'an jaqsılıq qılar edim», – dedi.
2 Shauldın' xojalıg'ının' Siba degen bir xızmetshi kisi bar edi. Onı Dawıttın' aldına shaqırıp keldi. Patsha onnan: – Siba degen senbisen'? – dep soradı. Siba og'an: – Awa, Siba degen qulın'ız men bolaman, – dep juwap berdi.
3 Patsha og'an: – Shauldın' xojalıg'ınan aman qalg'an adam bar ma? Men og'an Quday ushın jaqsılıq qılayın, – dedi. Siba patshag'a: – İonatannın' eki ayag'ı da mayıp bolıp qalg'an bir ulı bar, – dep juwap berdi.
4 Patsha onnan: – Ol qay jerde? – dep soradı. Siba patshag'a: – Ol Lo-Debardag'ı Ammiel ulı Maxirdin' u'yinde, – dep juwap berdi.
5 Solay etip, Dawıt patsha onı Lo-Debardan, Ammiel ulı Maxirdin' u'yinen aldırdı.
6 Shauldın' aqlıg'ı, İonatannın' ulı bolg'an Mefiboshet Dawıtqa keldi ha'm et-betinen jıg'ılıp, og'an ta'jim etti. Dawıt: – Mefiboshet! – dedi. – La'bba'y, qulın'ız usı jerde, – dep juwap berdi Mefiboshet.
7 Dawıt og'an: – Qorqpa, men a'ken' İonatannın' hu'rmeti ushın sag'an jaqsılıq qılaman. Atan' Shauldın' barlıq jerlerin sag'an qaytarıp beremen. Al sen ba'rqulla menin' dasturxanımnan awqatlanatug'ın bolasan', – dedi.
8 Mefiboshet ta'jim qılıp: – O'li iytke uqsag'an mendey qulın'ızg'a jaqsılıq qılatug'ınday, men kim bolıppan? – dedi.
9 Son'ınan patsha Shauldın' xızmetshisi Sibanı shaqırtıp alıp, og'an bılay dedi: – Burın mırzan' Shaulg'a ha'm onın' xojalıg'ına tiyisli bolg'an na'rsenin' ha'mmesin onın' aqlıg'ı Mefiboshetke berdim.
10 Endi mırzan'nın' aqlıg'ı kerekli azıq-awqat penen ta'miyinleniwi ushın, sen ha'm senin' ulların' menen qulların' onın' ushın jerdi ta'rbiyalap, o'nim alın'lar. Al mırzan'nın' aqlıg'ı Mefiboshet bolsa, ba'rqulla menin' dasturxanımnan awqat jeydi.Sibanın' on bes ulı ha'm jigirma qulı bar edi.
11 Siba patshag'a: – Taqsırım, qulın'ız bolg'an men buyırg'anların'ızdın' ha'mmesin orınlayman, – dedi. Mefiboshet patshanın' ullarının' biri sıyaqlı, patshanın' dasturxanınan awqat jedi.
12 Mefiboshettin' Mixa degen kishkene bir ulı bar edi. Sol waqıttan baslap, Sibanın' u'yinde jasaytug'ın ha'r bir adam Mefiboshetke xızmet etetug'ın boldı.
13 Mefiboshet ba'rqulla patshanın' dasturxanınan awqat jeytug'ın bolg'anlıqtan, Erusalimde jasadı. Onın' eki ayag'ı da mayıp edi.
