2 Patshalar 12 bob
1 Jaratqan İye payg'ambar Natandı Dawıtqa jiberdi. Sonda Natan Dawıtqa kelip, bılay dedi: – Bir qalada eki adam bolıptı. Olardın' birinshisi bay, al ekinshisi ka'mbag'al eken.
2 Bay adamnın' ju'da' ko'p mayda ha'm iri malları bar eken.
3 Biraq ka'mbag'aldın' satıp alıp, bag'ıp atırg'an bir urg'ashı qozısınan basqa hesh na'rsesi joq eken. Qozı ka'mbag'aldın' u'yinde balaları menen birge o'sipti. Onın' nanınan jep, kesesinen suw iship, qoynında uyıqlaptı. Sol adam ushın qozı o'z qızınday edi.
4 Bir ku'ni bay adamnın' u'yine bir jolawshı kelipti. Kelgen qonaqqa awqat tayarlaw ushın, o'zinin' qoy ha'm sıyırlarınan birin soyıwg'a baydın' ko'zi qıymay, ka'mbag'aldın' qozısın alıp, qonag'ına awqat tayarlap beripti.
5 Dawıttın' bay adamg'a qattı g'a'zebi kelip, Natang'a bılay dedi: – Tiri Jaratqan İye haqı ant ishemen: bunday isti islegen adam o'limge ılayıqlı!
6 Tasbawırlıq qılıp, usınday isti islegeni ushın, qozını to'rt ese qılıp to'lewi tiyis.
7 Sonda Natan Dawıtqa bılay dedi: – Sol adam sizsiz! İzraildın' Qudayı Jaratqan İye bılay deydi: «Men seni maylap, İzrailg'a patsha etip qoydım ha'm Shauldın' qolınan qutqardım.
8 Men sag'an mırzan'nın' u'yin berdim, hayalların da qoynın'a saldım. İzrail ha'm Yahuda xalqın da sag'an berdim. Eger bul da az bolsa, bulardan da ko'p na'rselerdi berer edim.
9 Solay eken, nege Menin' aldımda jawız islerdi islep, so'zimdi pisent etpedin'? Xett xalqınan bolg'an Uriyanı qılısh penen o'ltirip, hayalın o'zin'e aldın'. Awa, sen onı ammonlardın' qılıshı menen o'ltirdin'.
10 Bunnan bılay, ma'n'gige senin' xojalıg'ın'nan qılısh arımaydı. Sebebi sen Meni pisent etpey, xett xalqınan bolg'an Uriyanın' hayalın o'zin'e hayallıqqa aldın'».
11 Jaratqan İye ja'ne bılay deydi: «Sag'an o'z xojalıg'ın' arqalı jamanlıq keltiremen. Senin' ko'z aldın'da hayalların'dı alıp, jaqınların'nın' birine beremen. Ol ku'pa'-ku'ndiz hayalların'nın' qoynına kiredi.
12 Awa, sen bul isti jasırınsha isledin', biraq Men bunı pu'tkil İzrail xalqının' ko'z aldında ku'pa'-ku'ndiz isleymen».
13 Dawıt Natang'a: – Men Jaratqan İyege qarsı gu'na isledim, – dedi. Natan og'an: – Jaratqan İye gu'nan'ızdan o'tti, siz o'lmeysiz.
14 Biraq siz bul isin'iz arqalı Jaratqan İyenin' dushpanlarına Og'an til tiygiziwge jol qoyıp berdin'iz. Sol sebepli sizin' tuwılg'an perzentin'iz o'ledi, – dep juwap berdi.
15 Son'ınan Natan u'yine qayttı. Jaratqan İye Uriyanın' hayalının' Dawıttan tuwg'an balasın awır keselge duwshar etti.
16 Dawıt Qudayg'a bala ushın jalbarınıp, oraza tuttı. U'yine kelip, jerde jatqan halda tu'nlerdi o'tkerdi.
17 Saray aqsaqalları Dawıttı jerden turg'ızıw ushın kelgende, ol turıwdı qa'lemedi ha'm olar menen birge awqat ta jemedi.
18 Jetinshi ku'ni bala shetnedi. Xızmetshileri Dawıtqa balanın' shetnegeni haqqında xabarlawg'a qorqtı. Olar: «Bala tiri waqıtta, bizler onın' menen so'ylesken edik, biraq ol bizlerge qulaq aspadı. Endi balanın' shetnegenin og'an qalay aytamız? Ol o'zine qanday da bir jaman na'rse islep qoyar», – dep sıbırlastı.
19 Dawıt xızmetshilerinin' o'z ara sıbırlasıp atırg'anın ko'rgende, balanın' shetnegenin tu'sindi. Ol xızmetshilerinen: – Bala qaytıs boldı ma? – dep soradı. Olar Dawıtqa: – Awa, qaytıs boldı, – dep juwap berdi.
20 Sonda Dawıt ornınan turıp, juwındı. U'stine a'tir jag'ıp, kiyimlerin awmastırdı ha'm Jaratqan İyenin' U'yine barıp, sıyındı. Son'ınan u'yine qaytıp kelip, o'zine awqat beriliwin buyırdı ha'm aldına qoyılg'an awqattı jedi.
21 Xızmetshileri og'an: – Bul isin'izdi qalay tu'sinsek boladı? Bala tiri waqtında oraza tutıp, jıladın'ız. Al ol o'lgennen keyin, ornın'ızdan turıp, awqat jedin'iz, – dedi.
22 Dawıt olarg'a bılay dep juwap berdi: – Awa, bala tiri waqtında oraza tuttım, jıladım. Sebebi: «Kim biledi, Jaratqan İye mag'an miyrimin tu'sirip, bala jasap keter», – dep oylag'an edim.
23 Biraq endi bala o'ldi. Solay eken, oraza tutıwımnın' ne keregi bar? Onı qaytara alar ma edim? Men onın' janına baraman, biraq ol menin' janıma qaytıp kelmeydi.
24 Dawıt hayalı Bat-Shebanı jubattı ha'm janına kirip, onın' menen jattı. Bat-Sheba bir ul tuwdı ha'm onın' atın Sulayman dep qoydı. Jaratqan İye balanı su'ygenlikten,
25 Natan payg'ambardı og'an jiberdi. Natan Jaratqan İyenin' so'zi boyınsha balag'a Edidiya, yag'nıy «Jaratqan İyenin' su'yiklisi» dep at qoydı.
26 Sol waqıtları ammonlardın' Rabba qalasına qarsı sawash ju'rgizip atırg'an İoab patsha sarayı jaylasqan qorg'an qalanı qolg'a kirgizdi.
27 Son'ınan İoab Dawıtqa xabarshılar jiberip bılay dedi: «Men Rabba qalasına hu'jim qılıp, onın' suw tarmag'ın qolg'a kirgizdim.
28 Endi siz qalg'an a'skerlerdi baslap kelin' de, qalanı qorshap alıp, onı qolg'a kirgizin'. Eger qalanı men basıp alsam, qala menin' atım menen atalıp keter».
29 Dawıt pu'tkil a'skerlerin toplap, Rabba qalasına ketti ha'm qalag'a hu'jim jasap, onı qolg'a kirgizdi.
30 Dawıt olardın' patshasının' basındag'ı tajdı aldı. Hasıl taslar menen bezelgen, awırlıg'ı bir talant keletug'ın altın taj Dawıttın' basına kiygizildi. Dawıt qaladan ko'p mug'darda olja da alıp qayttı.
31 Al sol jerde jasaytug'ın xalıqtı jarg'ı, sho'kkish ha'm balta menen jumıs islewge, gerbish tayarlawg'a ma'jbu'r etti. Dawıt ammonlardın' qalalarının' ha'mmesinde usılay isledi. Son'ınan ol pu'tkil a'skerleri menen birge Erusalimge qaytıp ketti.
