2 Patshalar 1 bob
1 Shaul patsha qaza tapqan edi. Sol arada Dawıt amalekler u'stinen jen'iske erisip, Siklag qalasına qaytıp keldi ha'm ol jerde eki ku'n qaldı.
2 U'shinshi ku'ni Shauldın' ordasınan qayg'ısının' belgisi retinde kiyimlerin jırtıp, basına topıraq shashqan bir adam keldi. Ol Dawıtqa jaqınlasqannan jerge jıg'ılıp, og'an ta'jim etti.
3 Dawıt onnan: – Qay jerden kiyatırsan'? – dep soradı. Sol adam Dawıtqa: – İzrail ordasınan qashıp qutıldım, – dep juwap berdi.
4 Dawıt og'an: – Ne boldı? Mag'an aytıp ber, – dedi. Sol adam Dawıtqa: – A'skerler sawash maydanınan qashıp ketti. Olardın' ko'pshiligi qırılıp qaldı. Solardın' ishinde Shaul menen onın' ulı İonatan da o'ldi, – dedi.
5 Sonda Dawıt xabarshı jigitten: – Shauldın' ha'm onın' ulı İonatannın' o'lgenin qayaqtan bilesen'? – dep soradı.
6 Jigit Dawıtqa bılay dep juwap berdi: – Tosattan Gilboa tawına barıp qaldım. Qarasam, ol jerde Shaul nayzasına su'yenip turg'an eken. Al dushpannın' sawash arbaları menen arbakeshleri bolsa, og'an jaqınlasıp kiyatırg'an eken.
7 Sonda Shaul artına burılıp, meni ko'rip qaldı da, qasına shaqırdı. Men og'an: «La'bba'y», – dedim.
8 Ol mennen: «Sen kimsen'?» – dep soradı. Men og'an: «Men bir amalekpen», – dep juwap berdim.
9 Shaul mag'an: «Berman kelip, meni o'ltir. Sebebi janım shıqpay, qıynalıp atırman», – dedi.
10 Men janına barıp, onı o'ltirdim. O'ytkeni awır jaraqatlanıp qulag'annan keyin, tiri qalmaytug'ının bilgen edim. Men onın' basındag'ı tajı menen qolına tag'ılg'an shınjırın aldım ha'm olardı usı jerge, mırzam, sizge alıp keldim.
11 Bunı esitken Dawıt ha'm onın' janındag'ılar qayg'ıdan kiyimlerin jırttı.
12 Olar qılıshtan qaza tapqan Shaul, onın' ulı İonatan ha'm Jaratqan İyenin' xalqı bolg'an izraillılar ushın keshke shekem joqlaw aytıp jılap, oraza tuttı.
13 Dawıt o'zine xabar alıp kelgen jigitten: – Qay jerlisen'? – dep soradı. Jigit og'an: – Men bir kelgindi amalektin' ulıman, – dep juwap berdi.
14 Sonda Dawıt og'an: – Jaratqan İyenin' maylag'an adamına qol ko'terip, onı o'ltiriwge qorqpadın' ba? – dedi.
15 Son'ınan Dawıt adamlarınan birin shaqırıp: «Bar, onı o'ltir!» – dep buyırdı. Solay etip, sol adam amalek jigitti o'ltirdi.
16 Dawıt amalek jigitke: «O'z basın'a o'zin' jettin'. O'ytkeni: „Jaratqan İyenin' maylag'an adamın men o'ltirdim“, – dep o'zin'e qarsı o'z awzın' menen gu'walıq berdin'», – dedi.
17 Dawıt Shaul ha'm onın' ulı İonatan ushın joqlaw ayttı.
18 Son'ınan bul jır Yahuda xalqına u'yretilsin dep buyırdı. «Oq jay» dep atalg'an usı jır Yashar kitabında jazılg'an:
19 «Ha'y İzrail! Biyik to'beshiklerde joq boldı saltanatın'! Qalay jerge quladı batırların'?!
20 Bul xabardı Gatqa esittirmen', Ashkelon ko'shelerinde jayıp ju'rmen'. Esitip, filist qızları quwanbasın, Su'nnetsizlerdin' qızları shadlanbasın.
21 Ha'y, Gilboa tawları, U'stin'izge shıq tu'sip, jawın jawmasın, Jerlerin' o'nim de bermesin. Sebebi batırlardın' qalqanı, Endi qaytıp za'ytu'n mayı menen maylanbaytug'ın Shauldın' qalqanı, Sol jerde qulatıldı.
22 O'lgenlerdin' qanısız, batırlardın' ta'nisiz, İonatannın' oq jayı keri qaytpas edi, Shauldın' qılıshı hesh bos qaytpas edi.
23 Shaul menen İonatan su'ykimli ha'm jag'ımlı edi, O'mirde de, o'limde de birge boldı olar. Olar bu'rkitlerden de shaqqanıraq, arıslanlardan da ku'shlirek edi.
24 Ha'y, İzrail qızları! Sizlerge bezelgen qırmızı kiyimler kiygizgen, Kiyimin'izdi altın bezeniw buyımları menen bezegen Shaul ushın jılan'lar!
25 Wah, qalay qaza taptı batırlar sawashta! Biyikligin'de jatır o'li İonatan.
26 Senin' ushın qayg'ıraman, tuwısqanım İonatan, Men ushın sen ju'da' qa'dirli edin', Su'yispenshiligin' men ushın, Artıq edi hayal muhabbatınan
27 Wah, qalay qaza taptı batırlar! Qalay joq boldı urıs quralları!»
